जानकरांमुळे कट्टर समर्थकाचं तिकीट कापलं, अजितदादांनी सभेतच आमदारकीचा शब्द दिला!

डॉ. धनाजी चव्हाण, परभणी : राजेश विटेकर याला मी परभणी लोकसभा मतदारसंघामधून लोकसभेची तयारी करण्यासाठी सांगितले होते. तो देखील मागील सहा महिन्यांपासून संपूर्ण परभणी लोकसभा मतदारसंघांमध्ये फिरत होता. पण महायुतीमध्ये ही जागा महादेव जानकर यांना सोडावी लागली. मी राजेश विटेकर याला थांबायला सांगितले. त्यामुळे मी परभणीकरांना शब्द देतो की येणाऱ्या सहा महिन्यांमध्ये राजेश विटेकरला विधिमंडळाचा सदस्य केल्याशिवाय राहणार नाही, अशी जाहीर ग्वाही राज्याचे उपमुख्यमंत्री तथा राष्ट्रवादी काँग्रेस पक्षाचे राष्ट्रीय अध्यक्ष अजित पवार यांनी दिली.

परभणी लोकसभा मतदारसंघातून महायुतीचे उमेदवार महादेव जानकर यांचा उमेदवारी अर्ज आज भरण्यात आला. उमेदवारी अर्ज भरल्यानंतर विजयी संकल्प मेळाव्यामध्ये अजित पवार बोलत होते. यावेळी व्यासपीठावर उपमुख्यमंत्री देवेंद्र फडणवीस, माजी मंत्री पंकजा मुंडे, माजी मंत्री सदाभाऊ खोत, आमदार मेघना बोर्डीकर, आमदार बाबाजानी दुर्राणी, माजी आमदार रामप्रसाद बोर्डीकर, राजेश विटेकर हे प्रमुख उपस्थित होते.
परभणीच्या जाधवांची हॅट्ट्रिक रोखणार कोण? महायुतीचा उमेदवार ठरेना, जानकरांच्या नावाची चर्चा

पुढे बोलताना अजित पवार म्हणाले की, राजेश विटेकरला तयारी करायला सांगितली पण महादेव जानकर यांना प्रतिनिधित्व देण्याचं महायुतीमध्ये ठरलं. महादेव जानकर यांनी परभणी लोकसभेची जागा मागितली होती. त्यामुळे महायुतीमधल्या सर्व जणांनी सर्व जातीला सामावून घेण्यासाठी प्रत्येक समाजाला प्रतिनिधित्व देण्याचे ठरविले. त्यानुसार महादेव जानकर यांना परभणीमधून उमेदवारी देण्यात आली आहे. असे असले तरी मी राजेश विटेकरकडे दुर्लक्ष करणार नाही. येणाऱ्या सहा महिन्यात राजेश विटेकर याला मी विधानभवनामध्ये घेऊन जाईन, असा विश्वास परभणीकरांना अजित पवारांनी दिला.
परभणीत दिल मिल गये! अजितदादांच्या कोट्यातून उमेदवारी अर्ज, महादेव जानकरांचं शक्तिप्रदर्शन

या संकल्प मेळाव्यात राजेश विटेकर यांनी देखील प्रास्ताविक केले होते. प्रास्ताविकात राजेश विटेकर यांनी सांगितले की मला उपमुख्यमंत्री अजित पवार यांनी मागील सहा महिन्यापूर्वी परभणी लोकसभेची निवडणूक लढण्यासाठी तयारी कर असे सांगितले होते. मी मागील सहा महिने इमानइतबारे परभणी लोकसभा मतदारसंघांमध्ये तयारी केली. पण अचानक तीन दिवसांपूर्वी मला मुंबईला बोलून घेऊन सांगितले की राजेश परभणी लोकसभेची जागा महायुतीमध्ये महादेव जानकर यांना सोडण्याचे निश्चित झाले आहे. आणि तू आता आपले काम थांबव. दादांनी आदेश दिल्यानंतर मी माझा प्रचार थांबवला आणि महादेव जानकर यांना निवडणूक निवडून आणण्यासाठी कामाला लागलो आहे. माझ्याविषयी दादा जो काही निर्णय घेतील तो पक्षादेश मानून मी त्या निर्णायाला बांधिल असेल, असे विटेकर म्हणाले.